Angel Mislan

Ángel Mislan (jina la kuzaliwa: Ángel Mislan Huertas; 1 Machi, 1862 – 1 Februari 1911) alikuwa mtunzi muziki wa Danzas wa Puerto Rico.

Ángel Mislan

Maisha ya awali

Mislan alizaliwa huko San Sebastián, Puerto Rico ambako alilelewa na kusomeshwa mji mdogo sehemu ya magharibi ya Puerto Rico . Baba yake alikuwa mwalimu wa muziki ambaye alitoa masomo ya kibinafsi juu ya matumizi ya vyombo vya muziki. Mislan alijifunza kutoka kwa baba yake jinsi ya kupiga clarineti na euphoniumu-vyombo vya muziki vya kupuliza (na ambavyo vilikuwa ni muhimu katika uchezaji wa danza za Puerto Rico). Alipokuwa mdogo sana alikwenda Uhispania kuendeleza mafunzo yake ya muziki kwa kujifunza utunzi.

Kazi ya muziki

  Mnamo 1886, Mislan alipokuwa na umri wa miaka 24, alirudi Puerto Riko na kukaa Arecibo . Hapo alijiunga na bendi ya Kikosi cha jeshi cha Wanaojitolea; hatimaye, akawa mkurugenzi wa bendi hiyo. Katika kipindi hiki aliandika nyimbo zake mbili za danza zinazojulikana zaidi, " Sara " na " Tu y Yo " (Mimi na Wewe). Mtindo wake ulitofautiana na ule wa Manuel Gregorio Tavárez na Juan Morel Campos kwa kuwa danza zake kwa kawaida zilikuwa fupi na zenye ucheshi.

Mnamo 1898, Mislan alirudi katika mji wake ambapo alikua mkurugenzi wa bendi ya Manispaa. Hii ilikuwa nafasi muhimu, iliyoheshimiwa sana na jamii katika wakati huo. Mnamo 1906, alikutana na mwanamuziki mchanga kwa jina Juan F. Acosta na kumchukua chini yake. Mwigizaji huyo mkongwe alimfundisha utunzi wa muziki Acosta , wakati Mislan alipohamia kutoka San Sebastian hadi mji wa Barceloneta, alipendekeza Acosta achukue nafasi yake kama mkurugenzi mpya wa bendi ya Manispaa ya San Sebastian.

Urithi

Mislan alifariki katika mji wa Barceloneta, Puerto Rico mnamo Februari 1, 1911. Kando na kuandika danza, Mislan pia aliandika muziki wa kitamaduni wa Puerto Rico . Kazi zake nyingi zinalindwa katika taasisi ya Instituto de Cultura Puertorriqueña (Taasisi ya Utamaduni wa Puerto Rico). Mnamo 1948, mwimbaji wa Puerto Rico Julita Ross alirekodi danza za Ángel Mislan. Jiji la San Sebastián liliheshimu kumbukumbu ya Mislan kwa kuipa shule jina lake na kwa kuweka sehemu kubwa ya sanamu yake katikati ya uwanja wake.