Mkoa wa Pwani (Kenya)

Mkoa wa Pwani ni kati ya mikoa nane ya Kenya ukipakana na Bahari Hindi, Tanzania na mikoa ya Kenya ya Bonde la Ufa , Mashariki na Kaskazini-Mashariki.

Mahali pa mkoa wa Pwani katika Kenya

Makao makuu ya mkoa yapo Mombasa.

Mkoani kuna wilaya zifuatazo (makao makuu katika mabano):

• Wilaya ya Lamu (Lamu)
• Wilaya ya Mto Tana (Hola)
• Wilaya ya Malindi (Malindi)
• Wilaya ya Kilifi (Kilifi)
• Wilaya ya Mombasa (Mombasa)
• Wilaya ya Kilindini (Mombasa)
• Wilaya ya Kwale (Kwale)
• Wilaya ya Kaloleni (Kaloleni)
• Wilaya ya Kinango (Kinango)
• Wilaya ya Taita-Taveta (Voi)

Mombasa ndipo ilipo bandari kuu ya Kenya. Kuna maeneo muhimu ya utalii kama Malindi na sehemu za pwani kusini (Diani)na kaskazini (Kikambala) ya Mombasa. Eneo la Voi katika mkoa wa Pwani ni maarufu kwa kulima makonge.

Historia ya Mkoa wa Pwani

Pwani la Kenya ni nchi ya miji ya Waswahili hasa. Miji hii kama vile Lamu, Mombasa, Malindi, na mengine mengi iliyokuwa vituo vya biashara ya kimataifa tangu zaidi ya miaka 1000 iliyopita. Upepo wa monsuni ulibeba jahazi kutoka Uarabuni, Uajemi hata Bara Hindi kwenda pwani la Afrika ya Mashariki. Monsuni ulipogeuka kila baada ya nusu mwaka jahazi ziliweza kurudi kwao na bidhaa za biashara. Hivyo vituo vya biashara na mapumziko vikawa miji ya Waswahili, utamaduni uliounganisha tamaduni za wafanyabiashara Waarabu au Waajemi na Waafrika wenyeji wa pwani.

Miji ya kwanza ya Waswahili ilikuwa Lamu na Pate. Wakati wa kuja kwa Wareno mnamo mwaka 1500 BK Malindi na Mombasa ilikuwa miji muhimu zaidi.

Pwani ina pia magofu ya miji kama Gedi iliyokwisha bila sababu zake kueleweka.

Pwani limekuwa sehemu ya Usultani wa Zanzibar wakati wa karne ya 19 BK. Baada ya kuja kwa ukoloni wa Uingereza mwisho wa karne hiyo ya 19. BK Sultani wa Zanzibar alikodisha pwani kwa Wakoloni. Mwaka 1964 pwani lilikuwa sehemu ya nchi mpya ya Kenya.