Sirili wa Saloniki

Mtakatifu Sirili (kwa Kigiriki: Κύριλλος, Kyurillos; kwa Kisirili: Кирилъ;Thesalonike, 815; Roma, 14 Februari 869) alikuwa mmisionari, mmonaki na mtaalamu wa Kigiriki aliyeweka msingi wa utamaduni wa Kikristo kati ya mataifa ya Waslavoni.

Sirili na Methodio mitume wa Waslavoni

Tangu kale anaheshimiwa na Wakatoliki na Waorthodoksi kama mtakatifu.

Sikukuu yake huadhimishwa tarehe ya kifo chake.

Jina

Alipozaliwa na askari wa Kibizanti na mama Mslavoni mjini Thesaloniki (kifupi Saloniki) katika Ugiriki ya kaskazini wakati wa enzi za Dola la Bizanti alipewa jina la "Konstantino"

Jina la "Sirili" alilipokea baada ya kujiunga na monasteri.

Maisha

Ujana na elimu

Alipokea mafunzo yake ya ngazi ya juu kwenye chuo kikuu cha mji wa Konstantinopoli katika masomo ya falsafa, sarufi, mahubiri, muziki, hesabu, jiografia na astronomia. Alijifunza pia lugha za Kigiriki, Kilatini, Kiaramu na Kiebrania. Baadaye aliongeza Kiarabu. Lahaja za Kislavoni alizijua tangu utotoni.

Mwaka 848 alijiunga na utumishi wa Kanisa akapokea ushemasi. Katika mapokeo ya Waorthodoksi angeruhusiwa kufunga ndoa kwanza lakini aliamua kufuata mtindo wa wamonaki. Mwaka 850 alipewa kazi ya kufundisha falsafa kwenye chuo kikuu cha Konstantinopoli.

Safari kwa Waarabu na Wakhazari

Mwaka 851 alitumwa kama balozi wa Kaisari kwenda Samarra akiwa na ujumbe kwa Khalifa Al-Mutawakkil alipoingia katika majadiliano na wataalamu Waislamu kuhusu Mungu na Utatu.

Alifanya safari nyingine kubwa kwenda kwa Wakhazari waliokuwa Waturuki waliofuata imani ya Uyahudi katika maeneo kaskazini kwa Bahari Nyeusi.

Safari kwenda Moravia kati ya Waslavoni

Mwaka 862 Rastislav mtawala wa Waslavoni katika Moravia alimwomba Kaisari Mikaeli III Konstantino wa Konstantinopoli kumtuma "askofu na mwalimu" atakayefundisha watu wa kawaida katika Ukristo kwa lugha ya watu. Inaaminiwa ya kwamba Ratislav alitaka kujenga Ukristo na kanisa nchini mwake bila ya kutegemea majirani Wajerumani waliowahi kujenga misingi ya Ukristo katika Moravia. Hivyo alitafuta uhusiano na Bizanti iliyofuata mtindo tofauti wa Ukristo ambayo haikuwa chini ya Papa wa Roma.

Kaisari alimtuma Sirili pamoja na mdogo wake Methodio kwa sababu wote wawili walikuwa watu wa kanisa wenye elimu nzuri wakijua lugha ya Kislavoni toka kwa mama yao.

Tafsiri na alfabeti mpya

Tangu mwaka 863 Sirili na Methodio waliisha na kufanya kazi kati ya makabila ya Waslavoni. Walitafsiri sehemu za Biblia hasa Agano Jipya na liturgia katika lugha ya watu. Walifaulu hata kupata kibali cha Papa kwa matumizi ya Kislavoni kanisani. Waliunda aina ya lugha inayojulikana kama "Kislavoni cha kanisa" inayoendelea kutumiwa hadi leo katika liturujia ya Wakristo Waorthodoksi Urusi, Serbia na Bulgaria.

Kwa kazi yao walianzisha aina ya mwandiko wa pekee iliyokuwa chanzo cha alfabeti inayoitwa hadi leo "Kisirili" kwa heshima ya Sirili.

Kwa shughuli zao Sirili na Methodio walieneza Ukristo na kuweka msingi kwa utamaduni wa Kikristo kati ya mataifa ya Kislavoni ya leo.

Sala yake

Utakase, ulinganishe taifa lako katika imani ya kweli na ungamo sahihi, na kuangaza mioyoni neno la mafundisho yako.

Kwa kuwa ni zawadi yako kutuchagua tuihubiri Injili ya Kristo wako, kuchochea ndugu watende mema na kutimiza yanayokupendeza.

Wale ulionipa nakurudishia kama wako; uwaongoze sasa kwa mkono wako wa kuume wenye nguvu, uwalinde kivulini mwa mabawa yako, ili wote wasifu na kutukuza jina lako la Baba, Mwana na Roho Mtakatifu. Amina.

Tazama pia

• Watakatifu wa Agano la Kale
• Orodha ya Watakatifu Wakristo
• Orodha ya Watakatifu wa Afrika
• Orodha ya Watakatifu Wafransisko

Viungo vya nje

• The Life and Miracles of Saints Cyril and Methodius, Bishops and Apostles of the Christian Church Archived 3 Septemba 2014 at the Wayback Machine.
• Hati Slavorum Apostoli ya Papa Yohane Paulo II
• Cyril and Methodius – Encyclical letter (Epistola Enciclica), 31 December 1980 by Pope John Paul II
• "Cyril and Methodius, Saints" article in Encyclopædia Britannica.
•  "Sts. Cyril and Methodius". Catholic Encyclopedia. New York: Robert Appleton Company. 1913.
• "Equal to Apostles SS. Cyril and Methodius Teachers of Slavs", by Prof. Nicolai D. Talberg
• Catholic Culture
• Cyril and Methodius at orthodoxwiki
• Bulgarian Official Holidays, National Assembly of the Republic of Bulgaria: in English Archived 9 Juni 2008 at the Wayback Machine., in Bulgarian Archived 28 Novemba 2010 at the Wayback Machine.
• Bank holidays in the Czech Republic, Czech National Bank: in English Archived 31 Oktoba 2007 at the Wayback Machine., in Czech Archived 3 Novemba 2010 at the Wayback Machine.
• 24 May – The Day Of Slavonic Alphabet, Bulgarian Enlightenment and Culture,
• Cyril Archived 2 Februari 2011 at the Wayback Machine. at Patron Saints Index Archived 25 Juni 2007 at the Wayback Machine.
• Lettera Apostolica

Makala hii bado ni mbegu. Je, unajua kitu kuhusu Mkristo huyu, kama wasifu wake, habari za maisha au kazi yake? Je, unaona habari katika Wikipedia ya Kiingereza au lugha nyingine zinazofaa kutafsiriwa? Basi unaweza kuisaidia Wikipedia kwa kuihariri na kuiongezea habari.