Jimbo Katoliki la Morogoro

Jimbo la Morogoro (kwa Kilatini: Dioecesis Morogoroensis) ni mojawapo katika ya majimbo 35 ya Kanisa Katoliki nchini Tanzania kwa ajili ya waumini wake katika manispaa ya Morogoro pamoja na wilaya za Bagamoyo, Morogoro vijijini, Mvomero, Kilosa, Gairo n.k.

Eneo lote lina kilometa mraba 43,380.

Kutokana na historia yake linafuata mapokeo ya Kanisa la Kiroma, kama majimbo mengine yote ya Tanzania.

Historia yake

• 11 Mei 1906: Kuundwa kama Apostolic Vicariate of Central Zanguebar kutokana na Apostolic Vicariate of Zanzibar
• 21 Desemba 1906: Kubadilishiwa jina kuwa Apostolic Vicariate of Bagamoyo
• 25 Machi 1953: Kupandishwa hadhi kuwa Diocese of Morogoro

Uongozi wake

• Vicars Apostolic of Bagamoyo
  • Askofu François-Xavier Vogt, C.S.Sp. (1906.07.25 – 1923.05.19), kuhamishwa kuwa Vicar Apostolic of Cameroun
  • Askofu Bartholomew Stanley Wilson, C.S.Sp. (1924.01.09 – 1933.05.23), kuhamishwa kuwa Vicar Apostolic of Sierra Leone
  • Askofu Bernardo Gerardo Hilhorst, C.S.Sp. (1934.02.26 – 1953.03.25 tazama chini)
• Maaskofu wa Jimbo la Morogoro
  • Askofu Bernardo Gerardo Hilhorst, C.S.Sp. (tazama juu 1953.03.25 – 1954.08.11)
  • Askofu Herman Jan van Elswijk, C.S.Sp. (1954.07.18 – 1966.12.15)
  • Askofu Adriani Mkoba (1966.12.15 – 1992.11.06)
  • Askofu Telesphor Mkude (1993.04.05 – 2020.12.30)
  • Askofu Lazarus Vitalis Msimbe, S.D.S. (2019.02.13 – hadi sasa) kwanza kama Apostolic administrator sede plena halafu sede vacante. Hatimaye alipewa daraja ya uaskofu tarehe 19-9-2021.

Papa analisimamia jimbo pia kupitia Idara ya Uinjilishaji wa Mataifa.

Kazi zake

Likiishi katika eneo ambapo wananchi walio wengi ni Waislamu, linajadiliana nao kwa amani pamoja na kutangaza Injili ya Yesu Kristo.

Likitegemea uwezo wa Roho Mtakatifu katika liturujia linazidi kuwatakasa watu ili waishi kama watoto halisi wa Baba wa mbinguni.

Kwa mamlaka waliyokabidhiwa kwanza Mitume wa Yesu na kurithiwa kwa sakramenti ya daraja, linazidi kuwachunga waamini washuhudie upendo kati yao na kwa wote, hasa kwa kutumikia wanaohitaji huduma zake mbalimbali za kijamii pia (upande wa afya, elimu, n.k.).

Miundo na michango ya waamini mbalimbali

Mbali ya ofisi na taasisi mbalimbali (k.mf. seminari), miundo yake ya msingi ni parokia zilizoenea katika wilaya zake zote na zinazoongozwa na mapadri wanajimbo na wanashirika, ambao baadhi yao ni wazawa, baadhi walitokea nchi za jirani na za mbali (hasa Asia na Ulaya).

Watawa wa kike na wa kiume wengi wa mashirika 40 hivi wanatoa mchango wa pekee kwa kushuhudia maisha ya Yesu katika useja mtakatifu, ufukara na utiifu.

Hatimaye walei, ambao ndio wanakanisa walio wengi, wanatimiza utume wao katika majukumu ya kila siku ya maisha ya kawaida vijijini na mitaani, wakishirikiana katika mtandao wa vigango, vinavyotegemea sana makatekista, na wa jumuia ndogondogo za Kikristo, zilizopewa kipaumbele na Sinodi ya Afrika.

Malengo

Ni juhudi yao kulenga hali ya kujitegemea hata kiuchumi, ingawa hali halisi ya nchi ni ngumu kwa sababu zilezile zilizoathiri karibu nchi zote za bara hilo.

Wakitegemea neema ya Mungu, ni juhudi yao hasa kushinda dhambi ndani mwao wenyewe na ndani ya miundo ya jamii ili utawala wa Mungu uenee kote na kuleta utakatifu na wokovu, haki na amani.

Takwimu

Mwishoni mwa mwaka 2021 jimbo lilikuwa na waamini waliobatizwa 778,100 kati ya wakazi 1,838,700 (42.3%).

Katika parokia 63 kulikuwa na mapadri 179 (wanajimbo 86 na watawa 93), mabradha na mafrateri watawa 444 na masista 691.

Viungo vya nje

• www.catholic-hierarchy.org katika ukurasa [1]
• Giga-Catholic katika ukurasa [2]
• [3] Archived 11 Januari 2020 at the Wayback Machine. Tovuti rasmi ya jimbo

Makala hii kuhusu Kanisa Katoliki bado ni mbegu. Je, unajua kitu kuhusu Jimbo Katoliki la Morogoro kama historia yake au maelezo zaidi? Labda unaona habari katika Wikipedia ya Kiingereza au lugha nyingine zinazofaa kutafsiriwa? Basi unaweza kuisaidia Wikipedia kwa kuihariri na kuongeza habari.